كلمتين علي ما الرز يستوي

طول عمرنا بنشوف في الافلام الطيبين بيغلبو الشريرين. و دايما النهايه سعيده و فيها مزيكا عاليه تخليك تعيط وانت بتشوف الخير بينتصر علي الشر.

بس مش ده دايما اللي بيحصل في الواقع. اساسا ده بيحصل بنسبه ٢٠٪؜ بس من الواقع. الباقي مجرد ان الناس الغلبانين مبيشبعوش غلب و الشريرين عمالين يزيدو شر.

بس انا مش جايه انحنح و اعيط جنبكو هنا و اقول مساكين الطيبين مغلبوين علي امرهم. لا  

انا جايه اقول ان اللي اتربينا عليه غلط. و غلط علي مستوي اكبر من مجرد انه قيم و الا عادات.

اللي اتربينا عليه غلط علي مستوي "الطاقه" و "جذب المتشابه"

الكلام ده مهري فيه كتير بس خليني اشرحلك ببساطه.

لو طاقتك و تفكيرك و معتقداتك بتقول ان كل ما حاجه وحشه تحصلك او حد يظلمك او يضيع منك حلم معين تقوم قايل "اه مهو ده حظي" او "معلش " و الا "اهي دنيا و فانيه" .

او لما تكون تفكيرك ان "انا كويس كده ف مكاني اصل الناس اللي بيعلو ف المناصب او بيبقو اغنياء او بيحققو احلامهم دي ناس بتركب الترند و الا مبيراعوش ربنا و الا ظلمه والا والا"

انت مش بس بتوقف اي فرصه جايالك انت بتدمر اي امكانيه انك تتقدم او تتغير او تحسن من حياتك.

انا عيشت فتره طويله جدا من حياتي بخاف يجيلي فلوس عشان لو معايا فلوس اكيد انا مش كويسه او انانيه زي فلان قريبنا والا علان اللي نعرفه. لما وقفت مع نفسي ة فهمت ان مش عيب احلم و مش عيب ابقي غنيه و مش عيب اصحح طاقتي و اتوقع يجيلي كل اللي اتمناه. لما وقفت ة قولت مش كل غني شرير ة مش كل فقير طيب, ساعتها حياتي اتغيرت.

هنقول من ده كتير في البلوجات اللي جايه بس عشان اقوم اطفي ع الرز

سلام