احنا مش بنقابل الشخص الصح و الشخص الغلط. احنا بنقابل الشخص في الوقت المناسب او مش مناسب.

ايوه يعني ايه المقياس اللي بيحدد ان الوقت ده مناسب او لا؟ و مناسب لمين؟

الوقت مناسب ليك، و ليه او ليها. بمعني انك ممكن تقابل شخص و تمشي معاه مشوار و تكون كل الامور ما بينكم ماشيه، و في وقت معين انت بتتغير او هو بيتغير. مش شرط للاحسن او للاوحش، مجرد ان احلامكم مبقتش واحده او طريقه تفكيركم واحده او حتي معتقادتكم و افكاركم متوافقه. هو ده بالظبط معني الوقت المناسب او غير المناسب.

في البدايه كان الوقت مناسب لانكم متوافقين مع بعض و لان الظروف المحيطه ظروفك او ظروفه سهلت وسمحت ان الحياه ما بينكم تمشي. يمكن كمان مكنش في تحدايات كفايه من الحياه تبينلكم معدن بعض و هل فعلا ده اللي كل واحد فيكم مستنيه و متوقعه من التاني في ظرف معين، المهم ان الدنيا ماشيه معاكم حلو اوي، بعدين حد فيكم اتطور علميا فكريا او ايا كان علي اي مستوي، او اتغير تفكيره او معتقاداته او احتياجاته، فمبقاش الوقت ده من حياته هو الوقت المناسب اللي يسمح للشخص التاني بحالته الحاليه انه يفضل في حياته. و وارد جدا يكون السبب احداث او تحديات جديده في منيو الحياه كل واحد منكم اتصرف فيها بشكل مختلف عن اللي التاني كان مستنيه او متوقعه من شريكه. المهم الوقت وانت مبقتش ومناسب.

في ناس هتقولي طب يعني نعمل ايه؟ مدي ما حد اختلف عن التاني يسيب التاني و يمشي؟

هقولك لا، الاختلاف ده مبيظهرش في يوم وليله!

لو الاتنين ما بينهم عاده انهم دايما يتكلمو و دايما بيناقشو افكارهم و احاسيسيهم مع بعض هيحسو اول ما الاختلاف يبدا يظهر.

شريك حياتك لازم يكون اقرب صديق ليك ف البدايه. لازم يكون الشخص اللي متخافش ولا تتكسف تحكيله اي حاجه بتفكر فيها او بتحصلك.

و ساعات كتير حد من الاتنين بيحكي و يحكي و يحكي و يعبر عن هو حاسس ب ايه بس الشخص التاني يا مش فاهم يا مش حاسس يا اما مش عايز ياخد وقت يحس او يفهم فيه. هو ده الوقت اللي المسافه ما بين الاتنين بتفضل تكبر تكبر لحد ما بتبقي اكبر من انهم يشوفو الاختلافات اللي عماله تحصل جوه كل واحد منهم، و ساعتها الاختلاف الكبير بيبان مره واحده في الاخر علي انه اختلاف مفاجيء ، بس في الحقيقه هو م مفاجأة ولا حاجه.

المهم مضمون الكلام حاجتين:

١- كل الناس اللي عدت في حياتك كان لازم يكونو موجودين فيها. الناس اللي سبتهم و سبتوك هم مش وحشين ولا انت وحش، هو بس الوقت و الظروف اتغير توانت او هم اتغيرو.

٢-لو في حد في حياتك مهتم يكمل فيها و مرتاحين سوا، لازم لازم لازم تتعودو تتكلمو باستمرار مع بعض عن احاسيسكم و افكاركم و معتقداتكم و احلامكم بشكل دوري. الحاجات دي بتتغير صدقني ولو متكلمتوش فيها بشكل دوري هتتفاجئ انت و هو بالمسافه ما بينكم متاخر.

يلا سي يو 🤓

grandma therapy

اسطوره الشخص الصح في الوقت الغلط

كلمتين علي ما الرز يستوي