انترفيو حبيب محتمل

اول مره اخش في علاقه كنت مفكره الحياه وردي. مفيش حاجه تهمني ولا حد يفرق معايا غير الشخص اللي بحبه. حبنا اكبر من الدنيا بلوبيف بلوبيف. و مكنتش ببص اوي علي شكل العيله عاملين ازاي و مين المسيطر في البيت؟ ماما والا بابا ؟ ايه المشاكل الموجوده في البيت ده ؟ و ايه الصدمات اللي الشخص اللي بحبه اخدها من اهله. كنت مفكره ان الشخص ملوش يد في اهله مين و تصرفاتهم ايه؟

طبعا ده كان هبل و قله خبره. بعد سنين من علاقات تقرف و ناس عجيبه بتخش حياتي فهمت انه صح انت ملكش زنب في مين اهلك بس غصب عنك انت شارب من اهلك. هنا عندك حلين. يا تكمل بصدماتك و مشاكلك و تغمض عينك عن اي تحسن ممكن تعمله في حياتك . يا اما تشتغل علي نفسك و تكون صريح و امين مع نفسك عشان تعرف علي الاقل محتاج تحسن ايه.

بعد سنين بقول لنفسي " هو انا ليه بيحصل معايا كده " و بعد كتير جلسات ثيرابي و تدوين مذكرات و شغل علي نفسي . دخل حياتي شخص , كنت مرتحاله اوي بس في نفس الوقت لسه طالعه من ستميت خازوق. فكرت مع نفسي و طلعت في راسي فكره انا ممتنه جدا اني فعلا نفذتها.

معظم مشاكلي و الحاجات اللي اشتغلت عليها في الثيرابي كانت بدايتها البيت, يا اما اتكونت في الطفوله يا اما بعدين في البيت المهم انها جذورها الاساسيه البيت. منها حاجات حلتها و منها لا. فا قررت اني مش عايزه تاني ابدا اكون مع حد مش فاهم نفسه ولا عارف ايه مشاكله او تحديات حياته.

بدانا نقرب اكتر و نتكلم اكتر و مكالمه في التانيه الشخص ده عمال يعجبني اكتر و اكتر . قولتله بص , احنا مش هنبدا اي علاقه رسميه الا لما نتقابل شخصيا, هو كان عايش في بلد تانيه قررنا نتقابل بعد حوالي شهر او اكتر شويه.

في الخمس اسابيع دول كنبت فيهم نوت علي الموبايل طوييييييله عريضه فيها كلللللل الاسأله اللي عايزه اعرفها منه. عن شخصيته , احلامه , انجازات حيانه , بيحب يقضي اجازته ازاي, طفولته و مشاكلها , عيلته عامله ازاي , اهله سوا والا منفصلين , ايه الصدمات اللي خدها منهم ..... الخ الخ

كنت حاساني متخلفه وانا بقوله اول ما اتقابلنا "انا عملالك كويزشنيير " بس قهمته السبب اني عايزه اعرفه علي مستوي اعمق و هو كمان يعرفني علي مستوي اعمق. و ده كان احسن حاجه فعلا عملتها في حياتي.

دلوقتي و يعد ما بيقنا مع بعض سنتين , كل كام شهر باخدلي سوالين تلاته من الكويزشنيير اسالهولو واحنا علي العشا او خارجين في موعد.

عشان نفضل متطمنين اننا فاهمين و واصلين لبعض صح. انتو كمان اعملو انترفيو للحبيب المحتمل, اسالو اساله توريكم هل انتم فعلا هتتوافقو والا لا. بدل ما نبذل طاقه و مجهود في الفاضي.