أنت هو الشخص الوحيد اللي هيفضل معاك.

لو حد قالك انت بشع، هتحس بأيه؟ ولو حد قالك انت انسان جميل اوي هتحس بأيه؟

هل هيأثر في جوهرك و مضمونك رأي حد من الأتنين؟

طيب هتحاول تدافع عن نفسك او تفهم كل واحد فيهم بيقول كده ليه؟

لوقت طويل اوي من حياتي كنت محبوسه جوه قمقم ال جود جيرل سيندرم. عايزه مزعلش حد و لا أبدا أغضب ولا اعلي صوتي و احاول اكون مسالمه طول الوقت حتي لو حد غلط فيا. و عادي ناس تدوس عليا و اعديها مع أني مجروحه و ممكن تفوت ليالي منامش من القهر بس اوك.

مؤخرا حاولت افهم ليه مكنتش بتكلم؟ هل عايزه اتماشي مع المجتمع؟ هل عايزه احس اني محبوبه او متضمنه ضمن مجموعه واني مش لوحدي؟ هل اصلا معنديش المهارات الاجتماعيه اللي تخليني اساسا أرد و أخد حقي حتي لو عايزه أرد و أخد حقي؟

و الأجابه تقريبا كل دول … التقدير الذاتي ليا كان مصدره خارجي ١٠٠٪؜ مكنتش شايفه نفسي حلوه ولا مهمه ولا اتحب ولا اي حاجه من دي، عشان كده لما كان بيكون حد معايا كنت ببقي عايزه اشيله من ع الأرض شيل عشان مش مصدقه إني لقيت مصدر خارجي بتقدير الذات.

بعد مراجعات لحياتي و ذكرياتي و تجاربي و أفكاري و غلطاتي، مراجعات كتير اوي و حوارات مع النفس، عرفت قيمه نفسي، عرفت اني اهم من أي حاجه و أي حد في الكون، حسيت اني زي ما بحب اجيب هديه حلوه للشخص اللي بحبه، لازم كمان أدلع نفسي و اجيب هدايا حلوه لنفسي. أخودني و أروح اشتريلي هدوم و الا اخرج انعشي مع صحابي و الا نروح سينيما. أنا الشخص الوحيد اللي هيفضل معايا. زي ما أنت كمان الشخص الوحيد اللي هتفضل معاك مهما كان. فحب نفسك و قدرها و أعرف انك مهم و مختلف. بس وجودك لوحدك يكفي بصمتك.

ف لما حد يقولك انت بشع او انت انسان جميل، ده مهزكش لحظه ولا حتي يخليك تفكر مرتين في قيمتك او جوهرك.

حب نفسك اولا…