اوديسيوس

بعد ما شفت فيلم اوديسيوس، حسيت حزن كبير اوي جوايا

مش عشان الفيلم حلو والا وحش، الفيلم رائع ، بس حسيت بحزن لان علي الاقل اوديسيوس حس بالندم علي اللي عمله في طروي و الناس اللي قتلها و البيوت اللي حرقها و قطع راس اثينا ( ده تمثيل بس في الفيلم لكن في القصه الحقيقيه اوديسيوس مقطعش راسها ولا حاجه )

المهم انه ندم! و فاق و عرف انه مش معقول زيوس يقبل بكل العنف و الدمار ده.

علي النقيض، كل الفتوحات الاسلاميه، و الصليبيه و غيرها حروب قامت بسبب الاديان، حد فيهم فكر بعقله هل الرب اللي باعتك تحارب ده فعلا يقبل بالقتل و الدمار؟

وانا في السينما بتفرج علي الفيلم، افتكرت ازاي كنا بندرس الفتوحات الاسلاميه في المدرسه علي انها انجازات مهمه و عملاقه. طيب مفكرش خالد ابن الوليد و الا عمرو بن العاص في انك تاخد ارض حد و تجبره علي لغتك و دينك دي احساسها مش مظبوط؟

و عشان مكونش بتكلم عن جنب واحد نفس الامر ينطبق علي كرستوفر كولومبوس و نتينياهو و نابليون و جنكيز خان و غيرهم من ناس لحد النهارده بتاخد اراضي ناس و تقتل و تدمر عشان ايا كان السبب.

يمكن يكون ده جزء من طبيعه الحياه، يمكن الطبيعه زي ما في حيوانات بتقتل بعض، يمكن برده احنا لازم يكون فينا ناس بتقتل بعض؟ يمكن احنا مش احسن من الحيوانات ولا حاجه؟

يمكن محدش حس باللي حسه اوديسيوس و عشان كده هو مجرد اسطوره…