مش يمكن تنجح؟

امبارح بتفرج علي صور قديمه ليا، لقيت سكرين شوت لاول دفعه مصاريف الجامعه في اسبانيا، للي ميعرفنيش دي كانت تاني مره ادخل الجامعه بس المره دي بكامل إرادتي لاني وقتها قررت اغير كارير و مكنتش واثقه من اللي هغيرله، المهم اول دفعه كانت ٥ آلاف و نصف يورو و شويه فكه. كنت قاعده مع خطيبي، ضحكت و قولتله "ياالله شوف السكرين شوت دي" لقيته اتصدم، قالي السنه الواحده في جامعه امستردام ب الف و نص يورو! انتي دفعتي كل ده في ترم واحد؟ و بإرادتك؟ ومن مدخراتهم وانتي داخله علي التلاتين وقتها!! انتي بجد مجنونه.

قولتله اه، بس انا عمري ما ازعل والا اندم علي قرار اخدته ولا فلوس صرفتها

لو مكنتش خدت القرار ده، لو كنت لسه فضلت فى دبي و فٓضلت اني اوفر الفلوس علي اني اجرب اعيش مغامره جديده ممكن تنجح و ممكن تفشل، مضحكش عليكو وقتها كنت مرعوبه لان معرفش في حاله فشلت المغامره هعمل ايه،

بس أديها نجحت و علمتني ان علي أفضل الأحوال هتنجح مغامرتك و توصلك اماكن عمرك ما تخيلت تروحها، ولو فشلت مغامرتك ف اكيد هتعلمك كتير عن نفسك و عن العالم.

انا هفضل دائما أغامر و اجرب و اتحدي نفسي و عمري ما هقبل أفضل في مكان مش حاباه ولا قفص يحجم احلامي